Gjermania e pranon shitjen problematike të terminalit të portit të Hamburgut
Gjermania ka arritur një kompromis për një vendim që ngjalli debate, që të lejojë një kompani transporti kineze të blejë një aksion në një terminal të portit të Hamburgut
Marrëveshja është e diskutueshme sepse, në një kohë kur Gjermania po përpiqet të heqë dorë nga importet ruse të energjisë, kjo shihet si rritje e varësisë nga Kina.
Blerja mund të hapë mundësinë që Pekini të instrumentalizojë politikisht një pjesë të infrastrukturës të rëndësishme të Gjermanisë dhe Evropës.
Të mërkurën, qeveria gjermane ra dakord të lejojë COSCO Shipping të marrë një aksion prej më pak se 25%, në vend të 35% të planifikuar më parë.
Ministria e Çështjeve Ekonomike të Gjermanisë tha se vendimi ishte marrë për të parandaluar një "investim strategjik" nga COSCO në terminal dhe "e redukton blerjen si një investim thjesht financiar".
Nëse kompania kineze duhet që të lejohej të merrte pjesë në pronësinë e portit, shkaktoi një mosmarrëveshje politike kur Gjermania po luftonte me pasojat e varësisë së saj nga gazi natyror rus.
Ligjvënësit nga partia e Gjelbër dhe Demokratët e Lirë, të cilët formuan një koalicion qeverisës vitin e kaluar me socialdemokratët e Olaf Scholz, e kritikuan hapur propozimin e parë javën e kaluar.
Gjashtë ministri të qeverisë gjermane fillimisht e refuzuan atë me arsyetimin se COSCO, tashmë klienti më i madh i portit, mund të kishte shumë ndikim.
"Arsyeja e ndalimit të pjesshëm është se ekziston një kërcënim ndaj rendit dhe sigurisë publike," tha ministria e Çështjeve Ekonomike.
Pragu prej një çerek nuk mund të tejkalohet në të ardhmen, pa një proces të ri rishikimi të investimeve, tha ministria gjermane.
Ministria shtoi se COSCO-s i ndalohet që t'i japë vetes kontraktualisht të drejtën e vetos mbi vendimet strategjike të biznesit ose të personelit./Syri
