Moska: Rusia mund t'i arrijë qëllimet në Ukrainë vetëm përmes 'mjeteve ushtarake'
Kremlini këmbëngul se vetëm përmes “mjeteve ushtarake” Rusia mund “të arrijë qëllimet e saj” në Ukrainë, më shumë se një vit pasi Moska filloi luftën në ish-republikën sovjetike.
Në një konferencë për shtyp të hënën, zëdhënësi i Kremlinit Dmitry Peskov tha se për momentin nuk ka kushte për kalimin e procesit në një kurs paqësor në Ukrainë. "Për ne, prioriteti absolut vazhdon dhe do të mbetet gjithmonë arritja e objektivave të vendosura. Për momentin ato mund të arrihen vetëm me mjete ushtarake," tha zëdhënësi i Kremlinit. Megjithatë, Peskov nuk specifikoi qëllimet e sakta të Rusisë në Ukrainë pasi ato duket se kanë ndryshuar disa herë gjatë vitit të kaluar. Ish-zëvendësministri i Jashtëm gjerman Wolfgang Ischinger ka shkruar një artikull për gazetën Der Tagesspiegel, duke thënë se Perëndimi duhet të mendojë për një proces paqeje në Ukrainë dhe të krijojë menjëherë një grup kontakti ndërkombëtar. Kur u pyet për propozimin e Ischinger, Peskov të hënën e hodhi poshtë idenë, duke thënë: "Jo, ne nuk mendojmë kështu. Për momentin, ne nuk shohim asnjë nga kushtet që nevojiten për ta sjellë gjithë këtë histori drejt paqes".
