Bombardime të rënda në Kiev
Ushtria ruse në sulmet e natës shënjestroi bazat ajrore ukrainase.
Sipas Reuters, Rusia njoftoi se ushtria e vendit në sulmet e natës ka shënjestruar bazat ajrore ukrainase dhe si kundërpërgjigje, forcat ukrainase sulmuan objektet industriale brenda Rusisë. Agjencia shtetërore ruse e lajmeve, duke cituar ministrinë e mbrojtjes së vendit, raportoi se më shumë se një bazë ajrore ukrainase ishte shënjestruar, megjithëse dëmtimi i bazave ajrore ende nuk është konfirmuar nga Ukraina. Pas natës së dytë radhazi të bombardimeve duhet thënë se kryeqyteti i Ukrainës është sulmuar për herë të 16-të këtë muaj. Megjithatë zyrtarët thonë se shumica e dronëve dhe raketave të lëshuara gjatë natës u rrëzuan dhe asnjë objektiv në kryeqytet nuk u godit. Shtabi i Përgjithshëm i Forcave të Armatosura të Ukrainës gjithashtu njoftoi se të 11 raketat e përdorura në sulmet e natës u shkatërruan. Presidenti ukrainas Volodimir Zelenski në video-mesazhin e tij tha: "Koha për fillimin e kundërsulmit të Ukrainës është përcaktuar". Zelenski nuk dha më shumë detaje rreth fillimit të operacionit kundërsulmues, por theksoi se vendimi përfundimtar për fillimin e operacionit kundërofensivë është marrë.
