Ministrat e Jashtëm të Iranit dhe Kinës kanë zhvilluar një bisedë telefonike
Ministri i Jashtëm iranian zhvilloi bisedime me homologun e tij kinez për marrëdhëniet shumëpalëshe dhe rajonale, veçanërisht për zhvillimet e fundit në Palestinë.
Ministri i Jashtëm i Iranit, Hossein Amir-Abdollahian, denoncoi veton e SHBA-së ndaj një rezolute të Këshillit të Sigurimit të OKB-së, e cila kërkonte fundin e gjenocidit në Gaza, duke vlerësuar përpjekjet konstruktive të Kinës për të vendosur paqen dhe stabilitetin në rajon.
Ai, gjithashtu, nënvizoi nevojën për të luajtur një rol aktiv në ndalimin e luftës në Gaza.
“Siguria e rajonit është e rëndësishme për të gjithë ne dhe për këtë qëllim, Republika Islamike e Iranit ka zhvilluar disa raunde konsultimesh me vendet e rajonit”, tha kryediplomati iranian.
Ai theksoi edhe një herë se lufta është zgjeruar në rajon dhe nëse sulmet në Gaza nuk ndalen menjëherë, ekziston mundësia që i gjithë rajoni të angazhohet me të dhe gjërat të dalin jashtë kontrollit. Amir-Abdollahian pohoi se, për fat të keq, pala amerikane nuk e kupton mirë rrezikun që paraqet përhapja e luftës në të gjithë rajonin.
Ai shtoi se jeta politike e kryeministrit izraelit Benjamin Netanyahu, aleat i Shtëpisë së Bardhë, është e ndërthurur vetëm me vazhdimin e luftës dhe gjenocidit, por situata aktuale në rajon nuk është e qëndrueshme.
Ministri i Jashtëm kinez shprehu gjithashtu keqardhje për veton e SHBA-së ndaj rezolutës së armëpushimit.
Wang Yi tha se vendosja e një armëpushimi dhe dërgimi i menjëhershëm i ndihmave humanitare në Gaza janë të rëndësishme për Kinën. Ai shprehu shpresën se takimi i ardhshëm i Asamblesë së Përgjithshme të OKB-së do të jetë një mundësi për të vendosur një armëpushim në rajon.
Në fund të diskutimeve të tyre, Amir-Abdollahian dhe Wang Yi u shprehën të kënaqur me trendin e marrëdhënieve dypalëshe. Ata theksuan nevojën për vazhdimin e konsultimeve dhe forcimin e mëtejshëm të bashkëpunimit shumëpalësh.
