SAHAR

Lideri Suprem i Revolucionit Islamik Ajetullah Khamenei deklaroi se populli palestinez do të triumfojë dhe Izraeli do të çrrënjoset, duke përshëndetur popullin e Gazës dhe luftëtarët e saj për qëndrimin ‘si një shkëmb’ përballë një agresioni brutal të paprecedentë.

“Me ndihmën e Zotit, fronti i së drejtës padyshim do të fitojë dhe regjimi uzurpues sionist do të çrrënjoset, dhe ne shpresojmë që ju, të rinjtë, ta shihni këtë të ardhme të sigurt me sytë tuaj”, tha ai në Teheran të shtunën gjatë një takimi me një grup vizitorësh nga provincat Kerman dhe Khuzestan.

 Ai trajtoi ngjarjet e Rripit të Gazës gjatë dy muajve e gjysmë të fundit, duke i përshkruar ato “një fenomen unik dhe i jashtëzakonshëm në historinë e fundit të botës islame, të cilin nuk e kemi pasur në historinë e fundit dhe ndoshta as në shekullin e kaluar”.

“Ky fenomen është unik nga dy anë. Nga ana e regjimit sionist, ai është unik, sepse ky lloj brutaliteti, kriminaliteti dhe mizorie nuk është parë kurrë në periudhën që përmenda”, tha Ajetullah Khamenei.

“Kjo lloj vrasjeje fëmijësh, me bomba që shkatërrojnë bunkerët të hedhura mbi pacientët në spitale, kjo lloj mizorie dhe ligësie është e paprecedentë”, tha ai.

“Në anën tjetër – nga ana e popullit palestinez dhe luftëtarëve palestinezë, ky lloj qëndrimi, durimi dhe rezistence përballë çmendurisë së armikut nuk është parë kurrë”, shtoi Udhëheqësi Suprem i Revolucionit Islamik.

Ajetullah Ali Khamenei tha: “Populli i Gazës, luftëtarët e Gazës qëndruan si një shkëmb, si një mal. Është një gjë shumë e rëndësishme. Pa ujë, ushqime, ilaçe dhe karburant, ata qëndruan dhe nuk u dorëzuan. Kjo është shumë e rëndësishme."

“Mosdorëzimi i bën ata fitimtarë, edhe pse shenjat e fitores mund të shihen që sot”, shtoi Ajetullah Khamenei, duke cituar Kur’anin Famëlartë që thotë: “Vërtet, Allahu është me durimtarët”.

“Izraeli, me të gjitha armët dhe pajisjet, mbetet i pafuqishëm kundër luftëtarëve palestinezë, pajisjet e të cilëve janë pothuajse të pakrahasueshme me pajisjet e regjimit sionist”, tha ai duke shtuar: “Dështimi i regjimit sionist në këtë agresion është edhe dështimi i Shteteve të Bashkuara dhe sot askush në botë nuk bën dallim mes regjimit pushtues sionist, Amerikës dhe Anglisë, dhe të gjithë e dinë që ata janë një dhe e njëjta gjë”.

Udhëheqësi Suprem i Revolucionit Islamik tha se vetoja e SHBA-së për disa rezoluta të Këshillit të Sigurimit të OKB-së që kërkonin një armëpushim dhe ndërprerjen e bombardimeve në Gaza ishte “një akt i paturpshëm dhe bashkëpunim me regjimin sionist për të hedhur bomba mbi fëmijët, gratë, pleqtë, të sëmurët dhe njerëz të tjerë të pambrojtur”.

“Fitorja e madhe e kombit palestinez dhe e Frontit të së Drejtës dhe Rezistencës është se ai diskreditoi Perëndimin dhe Amerikën dhe ekspozoi natyrën e të gjitha pretendimeve të tyre të rreme për të drejtat e njeriut, pasi Izraeli nuk ishte në gjendje të kryente kaq shumë krime pa mbështetjen e Amerikës”.

“Dhe sot, fytyra e shëmtuar e përbindëshave mizorë të Amerikës dhe Anglisë është zbuluar për të gjithë njerëzit e botës”, tha Ajetullah Khamenei.

Ai theksoi se qeveritë dhe kombet kanë për detyrë të ndihmojnë Rezistencën në çdo mënyrë të mundshme. “Të ndihmosh Rezistencën është detyrë e të gjithëve dhe të ndihmosh regjimin sionist është krim dhe tradhti”, tha ai.

Ajetullah Khamenei shprehu keqardhjen për ndihmën kriminale të disa shteteve islamike ndaj regjimit sionist, duke thënë se kombet myslimane nuk do ta harrojnë atë.

“Qeveritë islamike”, tha ai, “kanë përgjegjësi për të parandaluar që mallrat, nafta dhe karburantet të arrijnë regjimin sionist, i cili madje ka penguar që uji të arrijë tek banorët e Gazës”.

Kombet myslimane duhet t’u kërkojnë qeverive të tyre të ndërpresin çdo lidhje dhe ndihmë për kriminelët sionistë, ose nëse nuk janë në gjendje ti ndërpresin lidhjet përgjithmonë, të paktën të bëjnë presion mbi regjimin e lig, mizor dhe gjakatar duke i ndërprerë përkohësisht ato.

“Sot, - tha Udhëheqësi Suprem, - ndërgjegjja e botës është lënduar përballë barbarizmit izraelit.”

“Njerëzit në Amerikë dhe Evropë po dalin në rrugë dhe disa figura politike, rektorët e universiteteve dhe shkencëtarët e tyre po protestojnë kundër mbështetjes së qeverive të tyre ndaj regjimit sionist, por pavarësisht kësaj, disa qeveri vazhdojnë ta ndihmojnë regjimin brutal sionist”, theksoi Ajetullah Khamenei.