Mediat izraelite: Sistemi i komandës dhe kontrollit të raketave të Hamasit, ‘plotësisht funksional’ pavarësisht luftës
Sistemi i komandës dhe kontrollit të Lëvizjes Palestineze të Rezistencës Islamike “Hamas” është ende në funksion, pavarësisht nga gati tre muaj bombardime dhe pushtime tokësore kundër Rripit të Gazës të rrethuar, thonë mediat izraelite pas operacionit të fundit raketor të grupit të rezistencës.
“Rezistenca nuk e ka humbur sistemin e saj të komandës dhe kontrollit”, tha të hënën një analist i lartë ushtarak izraelit në uebsajtin e lajmeve Walla, pasi Hamasi lëshoi një breshëri raketash në territoret e pushtuara pikërisht në fillim të Vitit të Ri.
“Bataretë e raketave nga Gaza dëshmojnë se Hamasi ka ende një sistem komandimi dhe kontrolli funksional dhe se ka aftësi për të lëshuar raketa me rreze të gjatë veprimi”, shtoi Amir Bohbot.
Analisti vuri në dukje se është shumë e vështirë të përcaktohen zonat “e pastruara” nga luftëtarët e Hamasit për shkak të numrit të madh të vendndodhjeve nëntokësore që i përkasin grupit të Rezistencës.
Ai tha më tej se sfidat e Izraelit në Gaza kanë mbetur të njëjta që nga fillimi i luftës, duke përfshirë çështjen e robërve, si dhe zyrtarët e Hamasit dhe infrastrukturën e tij.
Të dielën, ushtria izraelite pretendoi se lëshimet e raketave nga Hamasi kishin rënë nga një mesatare prej 75 në ditë në fund të nëntorit në vetëm 14.
Boaz Golan, themeluesi i faqes izraelite të lajmeve 0404, dyshoi në këtë pretendim, duke thënë: “Tani, Hamasi po gjuan dhjetëra raketa... Është koha të ndalojmë së ofenduari veten!”
Në një video të publikuar në mediat sociale, Brigadat al-Kassam, krahu i armatosur i Hamasit, tha se kishte gjuajtur raketa M90 në drejtim të Tel Avivit dhe zonave jugore në territoret e pushtuara “në përgjigje të masakrave ndaj civilëve” të kryera nga Izraeli.
Instituti për Studimin e Luftës, një institut kërkimor amerikan vlerëson se nga 26 deri në 30 batalione të luftëtarëve të Brigadave al-Kassam, që besohej se ekzistonin më 7 tetor – secili me nga 400 deri në 1000 burra, vetëm tre janë bërë joefektivë - ose, në gjuhën civile - janë shkatërruar.
“Hamasi mbetet elastik dhe i aftë për të rindërtuar aftësitë e tij ushtarake, pavarësisht humbjeve të tij ushtarake në luftë deri më tani”, deklaroi instituti amerikan i kërkimit.
