SAHAR

Irani ka riafirmuar solidaritetin e tij me popullin e shtypur të Palestinës, duke thënë se autorët izraelitë të krimeve të fundit në Rripin e Gazës duhet të ndëshkohen.

Ministria e Jashtme e Iranit publikoi një deklaratë të dielën me rastin e 75-vjetorit të krijimit të paligjshëm të regjimit izraelit, i njohur në mesin e palestinezëve si Dita e Nakbas, ose Dita e Katastrofës, e cila përkujtohet çdo vit më 15 maj. Më shumë se 750,000 palestinezë u larguan me forcë nga shtëpitë e tyre në Palestinë dhe 500 fshatra dhe qytete u shkatërruan nga milicitë sioniste përpara se regjimi izraelit të shpallte ekzistencën e tij të paligjshme. Palestinezët ende po i durojnë pasojat e kësaj katastrofe edhe sot e kësaj dite. Në deklaratën e saj, Ministria e Jashtme iraniane theksoi rëndësinë e mbështetjes së rezistencës së popullit palestinez kundër regjimit izraelit dhe kauzës së tij legjitime për çlirimin e territoreve të pushtuara dhe krijimin e një shteti të pavarur dhe të integruar me kryeqytet Kudsin e shenjtë. Deklarata theksoi se të gjitha planet politike të paraqitura gjatë tre dekadave të fundit kanë dështuar të prodhojnë ndonjë rezultat të prekshëm pasi ato nuk adresojnë shkaqet rrënjësore të krizës. Ministria e Jashtme iraniane përsëriti edhe një herë se zgjidhja e konfliktit qëndron në kthimin e të gjithë refugjatëve palestinezë në atdheun e tyre dhe një referendum me pjesëmarrjen e të gjithë banorëve origjinalë të Palestinës, duke përfshirë myslimanët, të krishterët dhe hebrenjtë, me qëllim të përcaktimit të fatit të tyre. Ministria e Jashtme e Iranit dënoi krimet e kryera në ditët e fundit nga regjimi fëmijëvrasës sionist kundër banorëve të Gazës, duke theksuar se aktet kriminale ishin një shkelje e qartë e parimeve ndërkombëtare si dhe një shkelje e rëndë e të drejtave të njeriut.