Amir-Abdollahian: Irani dhe Arabia do të zhvillojnë marrëdhëniet ekonomike dhe tregtare
Ministri i Jashtëm iranian deklaroi se afrimi midis Iranit dhe Arabisë Saudite nuk është thjesht "një marrëveshje taktike", dhe shtoi se të dyja vendet kanë rënë dakord të zhvillojnë marrëdhëniet dypalëshe ekonomike dhe tregtare.
Hossein Amir-Abdollahian i bëri këto komente në një intervistë për të përditshmen franceze Le Figaro, e cila u botua të hënën, në lidhje me rifillimin e marrëdhënieve mes dy vendeve. "Në politikën e jashtme të qeverisë aktuale iraniane, marrëdhëniet me fqinjët tanë janë një prioritet," tha ai, duke shtuar se kjo është arsyeja pse Republika Islamike zhvilloi negociata për sigurinë për disa muaj në Bagdad dhe Oman. Ministri i Jashtëm iranian vazhdoi duke thënë se më në fund gjatë vizitës së presidentit kinez në Arabinë Saudite u hodh në tryezë një ide e fortë. Rezultati ishte ndërmjetësimi kinez i cili bëri të mundur marrjen e hapit vendimtar midis Teheranit dhe Riadit, shtoi ai. “Ne nuk e konsiderojmë këtë afrim një marrëveshje taktike”, tha Amir-Abdollahian duke shtuar:" Qeveria saudite e ka bërë prioritet investimin në Iran. Kam biseduar për çështje ekonomike gjatë takimit tim të fundit me homologun tim saudit. Ne të dy ramë dakord të zhvillojmë marrëdhëniet tona ekonomike dhe tregtare në muajt dhe vitet në vijim." Ai shtoi se qeveria saudite tani e ka vënë në prioritet realizimin e projekteve ekonomike në Iran.
