Largohen nga kampi e ferrit, mbërrijnë në atdhe 5 gra dhe 14 fëmijë
Kanë mbërritur sot në atdhe 5 gra shqiptare dhe 14 fëmijë që jetonin prej vitesh në kampin famëkeq të “Al Holit” në Siri.
Familjet shqiptare ishin nisur nga Bejruti me një charter të vënë në dispozicion nga qeveria shqiptare, i cili zbarkoi sot në aeroportin “Nënë Tereza”.
“Lajmi i mirë është se 14 fëmijët dhe pesë gratë janë nxjerrë nga kampi i ferrit. Unë jam këtu për të marrë fëmijët dhe gratë dhe t’i kthej përsëri në atdheun tonë nesër”, tha kryeministri Edi Rama dje.
Kjo është përpjekja e tretë për riatdhesimin e shqiptarëve nga territoret luftarake në Siri. Në tetor të vitit të kaluar, 5 shqiptare u riatdhesuan ndërsa një fëmijë shqiptar u riatdhesua një vit më parë.
Disa qindra burra shqiptarë iu bashkuan Shtetit Islamik dhe grupeve të tjera që luftonin në Siri dhe Irak në fillim të viteve 2010. Shumë u vranë dhe gratë e fëmijët e tyre kanë qenë të ngujuar në kampet siriane./Syri
